XML in 10 punctos

(7, de facto...)

1. XML es un methodo de representar datos structurate in un file de texto

Con "datos structurate", imagina cosas tal como folios de calculo, listas de adresses, parametros de configuration, transactiones financiari, designos technic, etc. Le programmas que produce tal datos frequentemente los immagazina in disco, action pro le qual illos pote utilizar un formato binari o un formato textual. Le secunde formato permitte que tu, si necessari, examina le datos independentemente del programma que los ha producite. XML es un collection de regulas, directivas, conventiones, non importa como tu vole denominar los, pro projectar formatos textual pro tal datos, de un maniera que produce files que es facile de generar e leger (per un computator), que es inambigue, e pro evitar problemas commun, como carentia de extensibilitate, carentia de supporto pro internationalization/localization, e dependentia de platteforma.

2. XML ha aspecto de HTML ma non es HTML

Tal como HTML, XML face uso de etiquettas (parolas involvite per '<' e '>') e attributos (del forma nomine="valor"), ma durante que HTML specifica le significato de cata etiquetta e attributo (e frequentemente le apparentia que le texto inter illos va assumer in un navigator), XML usa le etiquettas solo pro delimitar elementos de datos, e lassa le interpretation del datos completemente pro le application que los lege. In altere parolas, si tu vide "<p>" in un file XML, non assume que illo es un paragrapho. Dependente del contexto, illo pote esser un precio, un parametro, un persona, un p... (a proposito, qui ha dicite que illo debe esser un parola con "p"?)

3. XML es texto, ma non ha essite facite pro esser legite

files XML es files textual, como io ha dicite supra, ma illos ha essite minus facite pro esser legite per le personas que HTML mesme. Illos es files textual perque illo permitte que expertos (tales como programmatores) elimina errores in applicationes plus facilemente, e in emergentias, illes pote usar un simple editor de textos pro reparar un file XML damnificate; si le file es damnificate, le application debe interrumper le processamento immediatemente e emitter un error.

4. XML es un familia de technologias

Existe XML 1.0, le specification que defini que es "etiquettas" e "atributtos", ma, circa XML 1.0, existe un crescente collection de modulos optional que forni collectiones de etiquettas e attributos, o directivas pro labores specific. Existe, per exemplo, XLink (ancora in disveloppamento in novembre 1999) que describe un maniera standard de adder hyperligamines a un file XML. XPointer e XFragments (equalmente in disveloppamento) es syntaxes pro punctar a partes de un documento XML. (Un XPointer resimila un poco un URL, ma in vice de punctar a documentos in le Web, illo puncta a elementos de datos intra un file XML.) CSS, le linguage de folios de stilo, es applicabile a XML assi como illo lo es a HTML. XSL (autumno 1999) es le linguage avantiate pro exprimer folios de stilo. Illo es basate super XSLT, un linguage de transformation que frequentemente es utile mesmo foras de XSL, pro rearrangiar, additionar o eliminar etiquettas e attributos. Le DOM es un collection standard de functiones pro manipular files XML (e HTML) a partir de un linguage de programmation. Le Spatios nominal XML es un specification que describe como tu pote associar un URL a cata etiquetta e attributo in un documento XML. Le utilization del URL depende del application que lo lege, totevia. (RDF, le standard del W3C pro metadatos, lo usa pro ligar cata metadato a un file que defini le typo de aquelle dato.) Le Schemas XML 1 e 2 adjuta le disveloppatores a definir precisemente lor proprie formatos basate super XML. Il ha multo plus modulos e utensiles disponibile o in disveloppamento. Consulta le pagina del reportos technic del W3C regularmente.

5. XML es prolixe, ma illo non es un problema

Viste que XML es un formato textual, e que illo utiliza etiquettas pro delimitar le datos, le files XML es quasi sempre major que formatos binari equivalente. Illo ha essite un decision consciente del disveloppatores de XML. Le avantages de un formato textual es evidente (vide 3 supra), e le disavantages usualmente pote esser compensate in un nivello differente. Le spatio in disco ja non es tanto dispendiose como illo soleva esser, e programmas como zip e gzip pote comprimer files multo ben e multo rapido. Iste programmas es disponibile pro quasi tote le platteformas (e usualmente es gratis). In addition, le protocollos de communication tal como protocollos de modem e HTTP/1.1 (le protocollo central del Web) pote comprimer datos in le momento del transmission, economizante largor de banda tanto effectivemente quanto un formato binari.

6. XML es nove, ma non tanto nove

Le disveloppamento de XML ha comenciate in 1996 e illo es un standard del W3C desde februario 1998, lo que pote facer te suspectar que illo es un technologia immatur. Ma de facto le technologia non es multo nove. Ante XML existeva SGML, disveloppate in le initio del annos 1980, standard ISO desde 1986, e amplemente utilizate pro grande projectos de documentation. E obviemente HTML, cuje disveloppamento ha comenciate in 1990. Le projectistas de XML simplemente ha extrahite le melior partes de SGML, guidate per le experientia con HTML, e ha producite un cosa que non es minus potente que SGML, ma es multo plus regular e simple de utilizar. Alcun evolutiones, totevia, es difficile de distinguer de revolutiones... E debe esser dicite que, durante que SGML es utilizate principalmente pro documentation technic e multo minus pro altere typos de datos, con XML occurre exactemente le opposito.

7, 8, 9...

Istes ancora attende definition.

10. XML es libere de licentiamento, independente de platteforma e ben supportate

Selectionante XML como base pro alcun projecto, tu ha a tu disposition un grande e crescente communitate de utensiles (un del quales pote ja satisfacer tu necessitate!) e ingenieros con experientia in le technologia. Optar pro XML es un poco como selectionar SQL pro bases de datos: tu ancora debe construer tu proprie base de datos e tu proprie programmas/proceduras pro manipular lo, ma existe multe utensiles disponibile e multe personas qui pote auxiliar te. E viste que XML, como un technologia del W3C, es libere de licentiamento, tu pote construer tu proprie software circa illo sin pagar a qualcunque persona. Le grande e crescente supporto significa, in addition, que tu non es ligate a un unic fornitor. XML non es sempre le melior solution, ma illo sempre merita esser considerate.

Copyright © 1999-2000 W3C^® (MIT, INRIA, Keio), tote le derectos reservate.