UN CADAVERE FLUCTUA IN LE FLUVIO

DOMINICA de bon hora Leo vadeva al feria hippie con su patre e le nonno. Era del Praça da República, con le vendita de statuettas, que Rafa tirava le sustenimento del familia. Uno non diceva que ille era un grande artista, mais vender es tamben un question de sympathia e persuasion, duo cosas que non mancava al ex-carpentero. Le statuetta de San Genaro, per exemplo, sempre habeva bon demanda, como tamben illes de Cosme e Damiano.

Quando Rafa e Pascoal vadeva al bar pro biber birra, Leo se cargava del venditas, sempre ben-succedite perque ille annunciava alto e insisteva quando alcuno demonstrava interesse.

Ille dominica, post vender alcun San Genaros, un JK e un bandeirante, Leo se sedeva sub le barraca, aperiva un jornal e comenciava a leger. Desde le die anterior ille cercava notitia re un cadavere incognite. E la era illo in le section de occurrentias policial: habeva essite trovate le corpore de un homine, flottante in le Fluvio Tietê. E ultra: ille non habeva morite necate, e in vice habeva recipite un tiro al corde, probabilemente a curte distantia. Le morto non portava identitate, mais a judicar per su tracias, on supponeva tractar se de un estraniero.

Debe esser le homine, pensava Leo. Mais estraniero, con ille facie de indiano? La resideva le dubita, pois quandocunque uno parlava re estranieros uno pensava a personas alte e blonde. Le notitia, tamen, non describeva le corpore. Io volerea vider lo, diceva le garson con un angustia que le dolerea per le resto del die.

Al prandio, como ille habeva promittite, Guima appareva in le casa del Fantinis.

Le vino, le macaroni e le polpettas non les permitteva toccar le caso disagradabile del hotel. Totes pareva haber multe sete e appetito, minus Leo, qui solo pensava a illo.

Post le prandio, le garson succedeva a restar sol con Guima.

— Uno trovava un corpore flottante in le fluvio, pote esser le homine.

— Il sempre ha corpores flottante in le fluvios.

— Mais iste non moriva necate, recipeva un tiro.

— Que plus le jornal dice?

— Ille non ha essite identificate, mais pare estraniero.

— Necun portrait?

— Necun.

— Alora il non ha maniera de saper.

— Il ha, si, Guima. Basta ir al Instituto Medic Legal.

— Mais tu non va facer illo.

— Tu non vole ir con me?

— Leo, tu genitores non vole que tu te involve. E illes ha ration. Le Baron es ric, forte como un cuirassato, sia distante de ille.

— Io volerea ir al Instituto.

— Io tamben. Mais io non va, ni tu.

Rafa retornava con altere bottilia de vino e le thema era ponite al latere.

Al arrivata del nocte, Guima e le Fantinis, con pancia plen, se sedeva ante le television. Il habeva un programma humoristic e totes rideva multo, con exception de Leo.

Quando ille vadeva al lecto, quasi medie-nocte, Leo ja habeva prendite un decision.

ï RETRO • AVANTE ð

Le Mysterio del Cinque-Stellas, de Marcos Rey.
Ab le original brasilian O Mistério do Cinco Estrelas.
Version in Interlingua per Ensjo.