LE LISTA

GUIMA appareva punctualmente, mais a pede, a fin que necuno identificarea su auto. Viste que amita Zula, a ille hora, ancora travaliava al cantina, le tres poteva restar bastante comfortabilemente in le sala.

— Le lista non es troppo grande perque io ja faceva alcun cancellamentos — diceva le portiero. — La il non ha, per exemplo, qualcunque nomine de femina, perque dar un colpo al capite me pare cosa de homine. Io tamben eliminava le personal del cocina e del restaurante: illes nunquam entra in contacto con le hospites. Io cancellava tamben illes qui solo travalia in le periodo nocturne, viste que toto succedeva de die.

— Mesmo assi le lista es ancora grande — observava Gino. — Forsan nos potera facer plus cancellamentos.

— Io cancellarea le empleatos plus nove — suggereva Leo.

— Bon idea! — exclamava Guima, comprendente le motivo. — Le Baron non se riscarea per abordar alcuno que ille mal cognosce. — E immediatemente ille passava le stilo sur quatro nomines del lista.

Gino arrugava le testa pro extraher del capite le nove suggestion. Era como ille faceva quando jocava chacos.

— Io ha altere cancellamento — ille annunciava.

— Qual? — Leo e Guima voleva saper.

— Audi ben. Le Baron non necessitarea, in le hotel, de un collaborator intellectual. Cerebro ille ja habe. Ille convocarea un homine de action e probabilemente multo forte.

Guima e Leo se interreguardava, examinante le idea. Leo ha essite le prime a approvar lo.

— Congratulationes, Gino! Illo es un bon idea! Que dice tu, Guima?

— De accordo, Gino — diceva le possessor del lista de stilo in pugno. — Ora si, il es possibile cancellar multe gente. Le plus debiles e le multo vetules.

— Es como si nos era a facer un [“retrato-falado”, litt. “portrait-parlate”, un portrait facite per investigatores policial basate sur le descriptiones de un persona]! — se enthusiasmava Leo.

Guima examinava le nomines.

— Vamos pensar un pauc plus — diceva Gino, lucide e calme. — Le ideal es reducer le lista a tres o quatro.

Illes se concentrava in un unic pensata; Guima tamburinava le digitos sur le tabula.

— Vos sape un cosa? — rememorava Gino. — Nos besonia un caffe. Io retorna tosto. — E se dirigeva con le sedia al cocina.

Tosto depost, bibente caffe, le tres se sentiva plus proxime a un nove suggestion eliminatori.

— Io trovava! — exclamava Leo.

— Vamos. Qual es?

Leo non supportava, ille non poteva evitar de levar se.

— Iste es genial!

— Vamos lassar le elogios pro depost — exigeva Gino. — Que tu ha inventate?

— Le persona qui me aggredeva mitteva un accenditor in mi tasca. Isto significa que? Significa que ille es fumator. Guima, retira del lista le empleatos qui non fuma.

— Un momento — intercedeva Gino. — Tu pensa que un modeste functionario de hotel haberea un accenditor tanto preciose?

— Poterea esser presente del Baron!

Ambes admitteva que si.

— Ben — diceva Guima — io non sape exactemente quales non fuma, mais tres io recorda con total certitude. — Cancellava le nomines. — Comocunque, le lista diminue.

— Io ja vide le profilo del homine! — exclamava Leo.

Mais le travalio de ille puncto in avante deveniva plus difficile. Restava ancora in le lista dece nomines, dece enigmas.

— Ora, solo per divination — concludeva Guima.

— Nulle divination — reprovava Gino. — Toto debe esser logic como in le chacos. Resta dece nomines? Tu, qui cognosce totes, cancella un a un. Comencia. Qual es le prime de iste dece que tu eliminarea del lista?

Guima se concentrava, sorbeva plus un tracto de caffe.

— Iste, per exemplo, Rubens da Silva, es in le hotel desde le inauguration e sempre ha travaliate in hoteles. Ille ha inclusive un carga in le syndicato.

— Cancella — ordinava Leo. — Io cognosce Rubens. Homine multo correcte.

— Isto me da un altere idea — parlava Gino. — Io eliminarea del lista totes qui ja travaliava in le hotel ante le arrivata del Baron e illes qui sempre exerceva le profession. Pensa ben. Io pensa que le Baron non se riscarea per involver un estranio in iste intriga tote. Su complice debe esser un de su homines e non un partenario de ultime hora.

Durante que Gino parlava, Guima nutava, concordante. E prendeva le stilo.

— Io pote cancellar Gustavo, tamben empleato del hotel desde le inauguration, con plus que vinti annos de hotel. Es un de ille personas qui morirea si ille debeva cambiar profession. Del altere latere, ille non es arrivista.

— Octo — diceva Leo. — Cancella plus.

— Io cancellarea tamben Bóris. Es un specie de chef del camereros. Ille ja ha essite gerente de parve hoteles. Tote su familia se dedica a iste ramo de activitate.

Leo e Gino restava bastante tacite pro que le silentio adjutarea Guima a pensar.

Le portero cancellava plus un nomine.

— Qui tu ha cancellate?

— Renato, altere typic functionario de hotel. Io pensa que ille jammais ha ganiate un centavo in altere profession. E ille es del turma del inauguration.

— Resta septe. Cancella plus, Guima.

— Non cancella solmente pro diminuer le lista. Si tu habera qualcunque dubita re le persona, mantene le — advertiva Gino.

Guima cancellava plus un nomine: Aderaldo.

— Iste io cancella solmente perque ille es mi amico e io sape que ille non se mitterea in cosas dishoneste e periculose.

Le tres restava reguardante le sex nomines que habeva restate como si illos formava un joco de parolas cruciate.

Leo habeva un altere suggestion pro facer, malgrado timidemente:

— Del sex, quantos travalia in le lavanderia?

— Tres — respondeva Guima immediatemente.

— Vamos nos concentrar sur illes — diceva Gino. — Al final, le corpore vadeva al lavanderia. Tu idea ha bastante logica, Leo. Le presentia de alcuno qui travaliarea in altere departamento attraherea multe attention.

— Non tanto — intercedeva Guima — le camereros va frequentemente al subsolo.

— Qui es le tres? — inquireva Leo.

Guima legeva le nomines e faceva commentos.

— Maneco, un portugese multo forte. Travalia desde plus que un anno retro; Luizão, un creolo qui non apprecia parlar multo. E Hans, Hans es le chef, o incargato, como illes dice.

— Sera que illes o alcun de illes cognosce le Baron?

— Io non sape, Gino — respondeva Guima.

— Tu cognosce ben le tres?

— Solo le Germano, es le cognomine de Hans.

Gino faceva un question directe:

— Qual de iste homines ha plus aspecto de delinquente?

Guima balanciava le capite, incapace de dar un responsa.

— Pro me illes es unicamente lavatores de roba.

Il habeva un longe pausa de disanimo total. Le lista habeva essite reducite a tres nomines mais le grande incognita persisteva. E nihil les induceva a suspectar plus de un que del alteres. Leo e Guima reguardava Gino, le jocator de chacos, de qui illes expectava un movimento superintelligente, plus un chaco, non contra le rege, mais contra le Baron.

— Que ille homines faceva ante travaliar al Park?

Guima de novo balanciava negativemente le capite:

— Io non sape.

— Era lo que io volerea saper — diceva Gino. — Tu pote discoperir?

— Si, in le Departimento de Personal.

— Tu pensa que illes darea le information?

— Obviemente illes non informa, mais un del garsones qui travalia la, Danilo, es un specie de affiliato mie. E ille debe le empleo a me. Si ille sera camerada, como io expecta, ille potera jectar un reguardo al scheda del tres. Tu crede que illo va esser utile?

Gino non era convicte mais ille se prendeva a un theoria.

— Le presente de un homine es narrate per su passato — diceva. — Illo es plus que simple intuition.

Guima se levava, decidite.

— Deman, al mesme hora, io retorna. Ciao.

Leo vadeva al lecto plus sperantiose que in le noctes anterior. Mais ille non dormiva tosto, pensante al lista de Guima, al tres homines qui restava e a Angela. Le impossibilitate de vider la multiplicava su sentimento pro illa. Altere mal que le Baron le habeva causate.

ï RETRO • AVANTE ð

Le Mysterio del Cinque-Stellas, de Marcos Rey.
Ab le original brasilian O Mistério do Cinco Estrelas.
Version in Interlingua per Ensjo.